3.1  Cada local poderá presentar ao concurso un máximo de dúas tapas, podendo aumentar a tres no caso de ser unha tapa vegana ou vexetariana.

Establécense catro modalidades:

TAPA TRADICIONAL, TAPA CREATIVA, TAPA DOCE e TAPA SEN GLUTE.

Enténdese por tapa creativa aquela que utilice técnicas de elaboración e presentación innovadoras.

Os prezos das tapas serán os seguintes:
Entre 2 € e 4 €.

3.2  Co fin de fomentar o uso de produtos autóctonos de temporada e de proximidade, fíxase como requisito imprescindible para participar que as tapas inclúan na súa elaboración, produtos galegos de calidade contrastada, tales como produtos das distintas denominacións de orixe ou indicacións xeográficas protexidas, produtos de agricultura ecolóxica ou produtos do mar de Galicia certificados.

3.3  Fase previa

SANTIAGO(é)TAPAS ten entre os seus obxectivos incentivar a cultura gastronómica en Compostela e fomentar a calidade da oferta. Con este fin, nas semanas previas, un equipo de preselección analizará as receitas e degustará as tapas presentadas a concurso (concretarase o día e hora con cada participante unha vez formalizada a súa inscrición).

Este equipo valorará que as propostas respondan ao concepto de tapa, entendendo por esta unha pequena porción de alimentos elaborados para acompañar cunha bebida. Non serán aceptadas aquelas que en realidade sexan racións ou medias racións e as que, ao seu xuízo, non ofrezan unha calidade mínima. Tampouco serán válidas para o concurso as tapas que habitualmente se sirvan de balde nos locais, aínda que se lles realizaran pequenas modificacións.

A organización comunicará aos locais a admisión ou non das tapas presentadas ao concurso. En caso de que a resolución sexa negativa, daráselles un prazo para presentar unha nova proposta ou ben mellorar a xa presentada.

Se non cumpren os requisitos mínimos, as tapas poderán ser excluídas do concurso.

3.4  As tapas admitidas deberán figurar na oferta habitual do local como mínimo durante os días de celebración do concurso (do 13 de febreiro ao 2 de marzo de 2025), exceptuando os días oficiais de peche do local que deberán ser detallados na ficha de inscrición. Pasado o concurso, as tapas presentadas poderán seguir formando parte da oferta de cada local.

3.5  Os locais participantes servirán as tapas como mínimo de 13.00 a 14.30 h. e de 20.30 a 21.30 h. e poderán ampliar este horario pero en ningún caso reducilo.
Os que por algunha causa xustificada non poidan cumprir o horario estipulado deberán comunicarllo á organización para que poida acordarse un horario fixo e reflectilo en toda a comunicación do evento.

3.6  Unha vez que a organización confirme a admisión das tapas presentadas, os establecementos participantes deberán aboar a cota de inscrición de 99 € (IVE incluído). Deberán facelo mediante transferencia bancaria ao número de conta de CaixaBank ES80 2100 6430 3113 0012 0004, indicando no concepto: SANTIAGO(é)TAPAS 2025 + nome do local.

Non se formalizará ningunha inscrición se non se fai efectivo o pagamento.

3.7  A organización fixa o número de locais participantes nun máximo de setenta (70), por rigorosa orde de inscrición.

En caso de que a demanda de participantes sexa moi elevada, abrirase unha lista de espera, co mesmo criterio da orde de inscrición, por se houbera baixas entre os establecementos admitidos. A organización resérvase o dereito a aumentar o número de participantes final en función da demanda.

3.8  Todos os locais participantes están obrigados a acudir á sesión fotográfica das tapas previa ao inicio do concurso (prevista para os días 13, 14, 15, 16 e 17 de xaneiro de 2025). A organización facilitará un servizo de fotografía para tal fin.

3.9  Durante toda a fase do concurso os participantes está obrigados a cumprir as seguintes regras:

Colaborar en todas as accións de comunicación, prensa e relacións públicas do evento.

Selar o “Tapasporte” a toda a clientela que o precise, logo de que consuma a tapa específica do concurso e emitan o seu voto.

Colaborar nos informes parciais sobre o número de tapas e na enquisa de valoración do evento que se realizará co fin de elaborar propostas de mellora para as futuras edicións.

Exhibir nun lugar visible do interior do local o distintivo que identificará os establecementos participantes no concurso SANTIAGO(é)TAPAS.

Indicar e diferenciar de xeito visible na súa oferta dentro do local as tapas que participen no concurso.

Exhibir nun lugar visible os elementos de votación.

Respectar o horario mínimo establecido para o servizo das tapas.

Servir a tapa cos mesmos ingredientes que se publicitan no Tapasporte.

Cando o xurado visite o local para cualificar as tapas, se detecta o incumprimento dalgunha das anteriores normas, restará da puntuación outorgada á tapa 0,5 puntos como sanción por cada incumprimento.